മരിച്ചവരുടെ സമവാക്യങ്ങള്
പൂജ്യത്തിനോട് പോലും കടം
അവശേഷിപ്പിച്ചു പോന്നയെന്നെയാണ്
കടമകള് തീര്ത്തവള് കടന്നു പോയെന്നവര്
വിശേഷിപ്പിക്കുന്നത്
വീഴാന് തുടങ്ങുന്ന പള്ളിയുടെ പടിക്കെട്ടുകളില്
ഉപേക്ഷിച്ചു പോന്ന പ്രണയം
കൂട്ടലുകളിലെ വലിയ കുറവായി
കടലാസിന്റെ മൂലയില് തുടരുന്നു
ഉള്ളതിനെ ഉള്ളത് കൊണ്ട് ഗുണിച്ചും പെരുപ്പിച്ചും
നല്കിയ സ്നേഹങ്ങള്
ശിഷ്ടമൊന്നും വെക്കാതെ
പുതിയ സംഖ്യകള് തേടി പോയിരുന്നു
ഇല്ലായ്മകളെ ഹരിച്ചു നോക്കിയപ്പഴോ
വീണ്ടും ഹരിക്കാനാവാത്ത പ്രതിസന്ധി സംഖ്യയും
ജീവിതം = മരണം എന്നൊരു സമവാക്യം
ചിന്തയിലുണ്ടായിരുന്നു
പക്ഷേ............
ജീവിതത്തില് നിന്ന് നഷ്ടങ്ങള് കുറച്ചപ്പോള്
നേട്ടം അഥവാ ലാഭമായി മരണം മാത്രം അവശേഷിച്ചു.
ജീവിതം - നഷ്ടങ്ങള് = മരണം
മരിച്ചവളുടെ സമവാക്യം
No comments:
Post a Comment